Во понеделникот, Mattel ја претстави својата прва Барбика со аутизам. Само шест месеци откако ја лансираше првата кукла со дијабетес тип 1, овој најнов додаток во линијата Barbie Fashionistas е осмислен за уште повеќе деца „да можат да се препознаат во Барбика“ и да ги поттикне сите деца да си играат со кукли кои го одразуваат светот околу нив.
Аутизмот е облик на неуродивергентност кој влијае врз начинот на кој луѓето го доживуваат општеството и комуницираат со него. Иако карактеристиките на аутизмот се разликуваат од личност до личност, според податоците на Светската здравствена организација, се смета дека повеќе од едно дете на сто е во аутистичниот спектар. Во соработка со американската организација Autistic Self Advocacy Network, аутистичната Барбика е дизајнирана така што претставува некои од начините на кои децата со аутизам можат да го доживуваат светот, да обработуваат информации и да комуницираат со околината.
Погледот на куклата е благо насочен настрана, што ја одразува фактичката состојба дека некои аутистични лица избегнуваат директен контакт со очите. Таа има целосно флексибилни лакти и зглобови, што овозможува повторувачки движења како стиминг и мавтање со рацете, кои на некои лица со аутизам им помагаат да обработат сензорни информации или да изразат возбуда.
На прстот носи (секако, розов) fidget spinner кој помага во намалување на стресот, на главата има (исто така розови) слушалки за поништување на бучава со цел да се намали сензорното преоптоварување, а со себе носи и (да, погодивте – розов) таблет со симболи за аугментативна и алтернативна комуникација, кој помага во секојдневната комуникација, пишува Guardian.
Барбика е облечена во лесен, виолетов фустан во А-крој со пруги, кратки ракави и здолниште што не прилега до телото, со цел да се намали контактот на ткаенината со кожата. Комбинацијата ја надополнуваат виолетови чевли со рамен ѓон, кои обезбедуваат стабилност и го олеснуваат движењето.
Иако првите Барбики датираат уште од 1959 година, сè до 2019 година немало кукли со инвалидитет. Денес постојат слепи кукли, Барбики во инвалидска количка, со Даунов синдром, протези, витилиго и слушни апарати. Постојат и Кен кукли со протеза за нога, во колички со рампа, како и модели со слушни апарати.
Најавувајќи ја аутистичната Барбика, Џејми Сигелман, глобална директорка на секторот за кукли во компанијата Mattel, изјави дека ова е најновото проширување на посветеноста на компанијата кон претставување на различноста и инклузијата.
„Барбика отсекогаш се стремела да го одразува светот што децата го гледаат и можностите што ги замислуваат, и горди сме што ја претставуваме нашата прва аутистична Барбика како дел од тој континуиран напор“, изјави таа. Оваа кукла „помага да се прошири поимот инклузија во светот на играчките и пошироко, бидејќи секое дете заслужува да се препознае во Барбика“, додаде Сигелман.
„Во текот на целиот процес на дизајн соработувавме со аутистичната заедница, имајќи предвид дека аутизмот кај секој поединец се манифестира различно и не е секогаш видлив. Елементите на оваа кукла го одразуваат начинот на кој некои лица од спектарот го доживуваат и го изразуваат светот, а се надеваме дека, преку соработка со влијателни гласови од заедницата, Барбика ќе продолжи да прикажува поширок спектар на автентични искуства.“
Барбика не е единствениот бренд што произведува аутистични кукли. Lottie продава кукли со аутизам, додека Lego има различни фигури со невидливи инвалидитети.
Извор: bizlife.rs
